الجدرى فى الطيور

الجدرى فى الطيور



كتير بيقابلنا فى الفيلد موضوع الجدرى وفى كل الطيور بلا استثناء بس اكتر حاجه هى الحمام والرومى والفراخ
الشكوى بتكون فى صاحب الحاله بيجى بيقول الفراخ مجدره وممكن ما يكونش عارف الجدرى بيقولك فى حب طالع فى وش الفراخ فى العرف والدلايات وفى العين وممكن فى المنقار وفى زوايا الفم
العلاج كالتالى :
طبعا ده مرض فيروسى فلازم يكون فى تحصين منه وفعلا موجود التحصين فى صوره امبول فى قرص التحصين وبيتم حله بماء مقطره او مذيب جى مع التحصين وبيتم حقن الفراخ فى منطقه فىى الجناح اسمها wing web هى منطقه مثلثه ومعروفه وبيتم التحصين باستخدام شوكه معينه بغمس الشوكه فى التحصين وغرسها فى المكان السابق ذكره والمعروف ان التحصين ده بيعمل حاجه اسمها solid immunity
يعنى بيكفى مره واحده بس فى العمر وباعرف ان التحصين تم بشكل جيد ان بيطلع مكان التحصين حاجه اسمها الحمصه حاجه زى الحبايه ولما الاقيها فى 2% من الطيور المحصنه ده معناه نجاح التحصين.

طيب لو فى حالات فعلا فيها اصابه يتم التعامل معها كالتالى :
1- عن طريق قلاحه ذره ناشفه باقوم بازاله الحب الموجود لحد ما يطلع دم معايه ده معناه انى طلعته من جدره بعد كده باقوم بغمس المكان بملح وليمون او بيبيتادين 10%
والهدف من ده انى باعقم المكان وفى نفس الوقت البيتادين المركز ده بياكل مكان الحبايه ويكوى الجلد وبالتالى يمنع من ظهور الجدرى مره تانيه وممكن ده باعمله مره واحده او 3 مرات بالكتير او لحد ما الحاله تخف
ويتم حقن الفراخ بمضاد حيوى واحسن حاجه هى الاوكسى تتراسيكلين طويل المفعول وجرعته فى الدواجن اسم لكل 4 كجم من الوزن يعنى الطيور الكبيره ممكن تاخد 1 سم والصغيره من 0.25 الى 0.5 سم حسب الوزن والهدف من المضاد الحيوى ده انه بينشف الجرح والحب وبرده علشان يمنع الاصابه الثانويه باى بكتيريه تانيه.
2- المرض ده فيروسى واى مرض فيروسى بياثر على المناعه علشان كده ممكن احط منشط للمناعه فى ماء الشرب زى الليفاميزول بجرعه 1 سم لكل لتر ماء
ه+ سيلينيوم 1 سم على اللتر
فيتامين اد3ه برده 1 سم على اللتر
3- بجرعه 1 جم على اللتربيتحط مضاد حيوى والاوكسى تتراسسيكلين من الحاجات الكويسه جدا وخصوصا فىى الجدرى
4- يتم تطهير المكان باى مطهر قوى زى اليود او الفنيك او المطهرات الغاليه بتاع المزارع زى الفيركون اس وال th4
5- من الافضل تغيير مكان التربيه فى حاله الاصابه او دخول اى طيور جديده لان الجدرى من الفيروسات الرخمه جدا والى ممكن تستنى فى المكان اكتر من 6 شهور
6- التحصين الاضطرارى للحالات الى ما ظهرش فيها المرض ده بالنسبه للفيلد
7- طيب بالنسبه للمزارع المرض ده نادر ومش بنشوفه فى دجاج التسمين لانه بيجى للاعمار الكبيره ودوره التسمين صغيره علشان كده مش بيتحصن لكن بيتحصن فى البياض والامهات لان الدوره طويله تقريبا سنه ونصف
فى حاله ظهور المرض فى المزارع يتم عمل الاتى
التحصين الاضطرارى للمرض
اوكسى تتراسيكلين فى ماء الشرب
روافع للمناعه
رش مطهرات على الطيور

اعتقد دى كل المعلومات العمليه الى ممكن تعرفوها عن مرض الجدرى وان شاء الله بس يعجبكم الموضوع وتقولوا رايكم واى تسائلات فى اى حاجه هارد عليكم على طول وشكرا ليكم